Logo

ज्येष्ठ सदस्य कांग्रेस सांसद ‘बेपत्ता’ भएपछि सुदूरपश्चिममा बहुमत सांसदले गरे बैठक बोलाउन लिखित माग

                     
Logo 2023-01-13 10:01     Desk

13

काठमाडौं, पुस २९ । सुदूरपश्चिम प्रदेशका बहुमत प्रदेश सभा सदस्यहरूले तत्काल प्रदेश सभाको बैठक आह्वान गर्न माग गरेका छन् । आज प्रदेशसभा सचिवालयका सचिव देवबहादुर बोगटीलाई ध्यानाकर्षण पत्र बुझाउँदै बहुमत प्रदेश सभा सदस्यहरूले संसद बैठक आह्वान गर्न माग गरेका हुन् ।

५३ जना प्रदेश सभा सदस्य रहेको सुदूरपश्चिम प्रदेशमा २९ जना प्रदेश सभा सदस्यहरूको हस्ताक्षर सहित प्रदेश सभा सचिवालयमा ध्यानाकर्षण पत्र दर्ता गरिएको हो ।

आज बिहान ११ बजे बैठक बस्ने भन्दै हिजो साँझ बैठक स्थगित गरिएको थियो । आज दिनभर बैठक बस्न सकेन । प्रदेश सभामा ज्येष्ठ सदस्य नेपाली कांग्रेसका सांसद शिवराज भट्ट बैठक अनिश्चित समय सम्मका लागि स्थगित गरेर सम्पर्कविहीन भएपछि सत्तारुढ दलका २९ जनाले तत्काल बैठक बोलाउन आह्वान गरेका छन् ।

आज बुझाइएको ध्यानाकर्षण पत्रमा माओवादीका ११, एमालेका १०, नागरिक उन्मुक्तिका ७ र राप्रपाका १ सांसदले हस्ताक्षर गरेका छन् ।

सभामुखका लागि माओवादी केन्द्रका भीम भण्डारी र कांग्रेसका मानबहादुर रावल उम्मेदवार हुनुहुन्छ । हिजो साँझ दुवै उम्मेदवारले बहुमत पाउन सक्नुभएन ।

पहिलो चरणमा भण्डारीले २७ मत पाएपछि दोस्रो पटक भएका मतदानमा १ मत बदर हुँदा २६ मत मात्रै पाउनु भएको थियो । दोस्रो पटक पक्षमा पनि २७ मत नआउँदा उहाँ सभामुख हुन पाएनन् । कांग्रेसका रावलले दुवै पटक २३ मत पाउनु भएको थियो । ५३ जना प्रदेश सभा सदस्य रहेको सुदूरपश्चिम प्रदेशमा सभामुखमा निर्वाचित हुन २७ मत आवश्यक पर्छ ।

सत्ता गठबन्धनका सांसदहरूले तत्काल बैठक बोलाएर सभामुख निर्वाचन प्रक्रियालाई अघि बढाउनु पर्ने माग गरिरहेका छन् । तर कांग्रेसको निर्देशनमा भट्ट बेपत्ता हुनुभएको छ ।


लोकप्रिय छुटाउनुभयो कि ?