Logo

राजवंशी (विराट) लाई १२८ औं जातिजातिमा सूचिकृत गरिने–मन्त्री ढकाल

                     
Logo 2021-02-18 10:02     Desk

13

विराटनगर,६ फागुन । सङ्घीय संस्कृति, पर्यटन तथा नागरिक उड्डयन मन्त्री भानुभक्त ढकालले राजवंशी समुदाय (विराट)लाई १२८ औ जातजातिमा सूचिकृत गर्ने बताएका छन् । राजवंशी समाज उत्थान समिति(विराट)केन्दीय कार्यालयद्वारा आज यहाँ आयोजित १४ औं वृहत भेलामा उहाँले अहिलेसम्म १२५ जातजाति सूचिकृत भएको र अन्य दुई सहित यो समुदायलाई पनि सूचितकृत गर्न चाँडै सङ्घीय मामिला तथा प्रशासन मन्त्रालयमार्फत मन्त्रीपरिषद वैठकमा प्रस्ताव लग्ने विश्वास दिलाए ।

मन्त्री ढकालल राजवंशी समुदाय यस क्षेत्रको आदिवासी तथा भूमिपुत्र हुनका साथै रैथान समुदाय भएकोले उनीहरुलाई राज्यबाट सम्मान गर्ने कार्यका कहिले विभेद नहुने बताए । उनले विगत १४ वर्षदेखि सूचितकृत हुन आन्दोलित यस समुदायलाई त्यस अघि सरकारले नगरेकोमा दुःख व्यक्त गर्दै वर्तमान सरकारले आन्दोलन नगरिकन अधिकार प्रदान गर्ने विश्वास दिलाए ।

मन्त्री ढकालले राजवंशीलाई आदिवादी जनजातिमा सूचिकृत गरी प्रदान गर्नुपर्ने सुविधा प्रवाह गरेको बताउदै यस सम्वन्धमा अन्य कुनै अर्को समुदायले सुविधा उपयोग गरेका सम्वन्धमा चनाखो हुन आग्रह गरे । उनले वर्तमान अवस्थामा हिमाल मात्रले पर्यटन प्रवद्र्धन नहुनाले राष्ट्रमा रहेका मौलिक संस्कार, भाषा, संस्कृति, खाद्य परिकार, पहिरन र धर्मलाई जोडेर जानुपर्ने आवश्यक्ता औंल्याए ।

समिति (विराट) का केन्द्रीय अध्यक्ष भुवनेश्वर मण्डलले राजवंंशीको अलग्ग, भाषा , पहिचान एवं संस्कृति भएपनि विगत १३ वर्षदेखि राज्यले सूचितकृतका लागि सम्वोधन नगरेकोमा गुनासो व्यक्त गरे ।

नेकपाका केन्द्रीय सदस्य सत्यनारायण चौधरी, थारु कल्याणकारी सभाका मोरङ अध्यक्ष प्रदीप भगत, राजवंशी संस्कृतिका अध्यक्ष कुशेश्वर राजवंशी,गुप्त नारायण मण्डल, राप्रपा मोरङ अध्यक्ष माधव आचार्य,राजकुमार राजवंशी, कला राजवंशी र प्रदीपकुमार विश्वासले समुदायका सम्पूर्ण सदस्यहरुले आगामी विसं २०७८ हुने राष्ट्रिय जनगणनामा राजवंशी(विराट) उल्लेख गर्नुपर्नेमा जोड दिए ।

मोरङ, झापा र सुनसरीमा अधिकाँश राजवंशी(विराट)हरुको वासोबास रहेको र उनीहरुको जनसङ्ख्या एक लाख भन्दा वढी रहेको समुदायका सदस्य सूर्यनारायण राजवंशीले जानकारी दिए । राजवंशी समुदायमा पुरुषले धोती, गम्छा र पाइजामा लगाउने गर्दछन् भने महिलाको सारी र चोलो पहिरन रहेको छ ।


लोकप्रिय छुटाउनुभयो कि ?